ӨВӨЛЖИЛТИЙН БЭЛТГЭЛ ХАНГУУЛАХ ЗОРИЛГООР МАЛЧИН ӨРХӨӨР ТОЙРОЛТ ХИЙЛЭЭ
Сумын Засаг даргын шийдвэрийн хүрээнд Засаг даргын орлогчоор ахлуулсан хүн эмнэлэг-1, онцгой байдлын хэлтэс-1, мал эмнэлгийн тасаг-2, хүнс, хөдөө аж ахуйн тасаг-1, татварын тасаг-1, жолооч гэсэн 7 хүний бүрэлдэхүүнтэй ажлын хэсэг гарч сумын 45 малчин өрхөөр тойролт хийж ажилласан.
Тус ажлын хэсгийн бүрэлдэхүүн нь сум орон нутгаас хэрэгжүүлж буй цаг үеийн шинжтэй ажлуудыг танилцуулах, сумын нутаг дэвсгэрийн бэлчээрийн даацын судалгааг үндэслэн отор нүүдэл хийх талаар зөвлөмж, улс аймгийн хэмжээнд малын гоц халдварт болон халдварт өвчний гаралт тархалтын мэдээ, цаг уур орчны шинжилгээнээс гаргасан цаг агаарын төлөв байдал, өвс тэжээлийн үнэ ханш, малын тоо толгойд тааруулан өвөл хаврын цагт хэрэглэх өвс тэжээлийн нөөц бүрдүүлэх, онцгой байдлын алба хаагч нь байгалийн гамшигт үзэгдэлд өөрийнхөө амь насыг хэрхэн аврах, татварын байцаагч нь малын тоо толгойн албан татварын тухай хуулийн ач холбогдлыг танилцуулан, төвлөрүүлэх, хүний их эмч нь өндөр настан, хөгжлийн бэрхшээлтэй иргэн, хүүхэд зэрэгт анхан шатны эрүүүл мэндийн үзлэг хийх зэрэг өөрсдийн чиг үүргийн дагуу ажилласан. Мөн сумын Засаг даргаас өвлийг өнтэй даваарай гэж илгээсэн хүнсний багцыг тарааж ажилласан.
2023.12.05
