ХУУЛЬ ЗҮЙН ТУСЛАЛЦААНЫ ТӨВИЙН ЗАМЫН-ҮҮД ДЭХ САЛБАР АЖИЛЛАЖ БАЙНА
“Төлбөрийн чадваргүй иргэнд хууль зүйн туслалцаа үзүүлэх Үндэсний хөтөлбөр”-ийг Засгийн газрын 2006 оны 263 дугаар тогтоолоор баталсан. Тус хөтөлбөрийг батлах болсон үндэслэлийг “Монгол Улсад эрүүгийн хэрэгт холбогдсон, ял эдэлж байгаа хүмүүсийн 80 орчим хувь нь нэн ядуу, ядуу, боловсролын түвшин доогуур, эсхүл боловсролгүй, ажилгүй байна. Өөрөөр хэлбэл төлбөрийн чадваргүй буюу амьжиргааны баталгаажих доод түвшингээс доогуур амьдралтай иргэд гэмт хэрэг үйлдэх нь ихэсч байна. Тухайлбал улсын хэмжээнд ял шийтгүүлж буй этгээдүүдийн 70.9 хувь нь төлбөрийн чадваргүй байх магадлалтай хүмүүст хамаарч байна.
2008 оноос Хууль зүй, дотоод хэргийн яам Нээлттэй нийгэм форум, НҮБ-ын Хөгжлийн хөтөлбөрийн “Хууль зүйн үйлчилгээний хүртээмж ба хүний эрх” төсөл, аймаг, сум, дүүргийн Засаг даргын Тамгын газартай хамтран “Эрх зүйн туслалцааны төв”-ийг бүх аймаг, дүүрэг болон зарим суманд байгуулан ажиллуулж эхэлсэн бөгөөд “Төлбөрийн чадваргүй яллагдагчид үзүүлэх хууль зүйн туслалцааны тухай хууль”-ийг Улсын Их Хурлаас 2013 оны 07 дугаар сарын 05-ны өдөр батлагдсан бөгөөд 2014 оны 01 дүгээр сарын 01-ний өдрөөс хэрэгжиж эхэлсэнтэй холбогдуулан Хууль зүйн туслалцааны төв байгуулагдан ажиллаж байна.
Хууль зүйн туслалцааны төв нь одоогийн байдлаар 21 аймаг, Нийслэлийн 8 дүүрэг, хүн ам ихээр төвлөрсөн 2 суманд нийт 31 салбарт 72 албан хаагчтайгаар төлбөрийн чадваргүй яллагдагчид үнэ төлбөргүй хууль зүйн туслалцаа үзүүлэх ажлыг амжилттай гүйцэтгэж байгаа бөгөөд Хууль зүйн туслалцааны төвийн Замын-Үүд дэх салбар нь 2008 оноос эхлэн сумын Засаг даргын Тамгын газарт байрлан үйл ажиллагаагаа тасралтгүй явуулж ирсэн.
Хууль зүйн туслалцааны төвийн Замын-Үүд сум дахь салбарын эрхэм зорилго "Төлбөрийн чадваргүй эрүүгийн хэрэгт холбогдсон яллагдагчид өмгөөллийн үйлчилгээ үзүүлэх, хууль зүйн зөвлөгөө өгөх, иргэдэд үнэ төлбөргүй хуулийн зөвлөгөө өгөхөд оршино".
Холбогдох утас: 96669458
