АЖЛЫН ХЭСЭГ АЖИЛЛАЖ БАЙНА.
Өнгөрөгч амралтын өдрүүдэд сумын нутаг дэвсгэрт газ тархаж, иргэдийн эрүүл мэндэд сөргөөр нөлөөлж, улмаар шатаж дэлбэрэх эрсдэл үүсэж болохуйц нөхцөл байдалд хүргэсэн газрын тосны бүтээгдэхүүний үйлдвэрлэл эрхлэх тухай зөвшөөрөлтэй “Трансгейт интернэшнл” ХХК-ны үйлдвэрийн үйл ажиллагааг Сумын Засаг даргаас мэргэжлийн байгууллагын дүгнэлт, шийдвэр гарах хүртэл түр зогсоосон.
Тус компанид 2010 онд Сумын Засаг даргын A/40 тоот захирамжаар газрын зөвшөөрлийг олгосон бөгөөд өнгөрөгч өдрүүдэд туршилтын ажлыг эхлүүлсэн боловч технологийн горим алдагдсанаас газын хий агаарт тархсан байна.
Аймгийн Засаг даргын 2023 оны А/366 дугаар захирамжаар нөхцөл байдалтай танилцах, шаардлагатай арга хэмжээ авах ажлын хэсгийг томилж газар дээр нь үйл ажиллагаа, баримт бичигтэй танилцан агаарын чанарын хяналтын шинжилгээ авлаа.
Цаашид үүсэж болох эрсдэлээс сэргийлж тус байгууллагыг сумын төвөөс нүүлгэх, цаашлаад үйл ажиллагаа эрхлэх тусгай зөвшөөрлийг цуцлуулах саналыг холбогдох яам, агентлагт уламжлаад байна.
